Senter for Søvnmedisin ved Haukeland universitetssjukehus opna i mars 2011. Senteret ligg administrativt under Lungeavdelinga, men alle dei tre fagavdelingane som i dag driv utgreiing og behandling av søvnsjukdommar; lunge- øyre-nase-hals- og nevrologi/nevrofysiologi, samarbeider om senteret. I tillegg er det knytt ein psykiater til senteret.
Senter for Søvnmedisin utgreier og behandlar i hovudsak pasientar med respirasjonsrelaterte søvnsjukdommar og alvorlege hypersomniar og gjev desse ei overordna einsretta utgreiing og behandling. Alvorlege insomniar og døgnrytmeforstyrringar kan dersom det er kapasitet vurderast utgreidd med polysomnografi dersom tidlegare utgreiing og behandling ikkje har lukkast. Målet for avdelinga er å tilby pasientane ei best mogleg utgreiing og behandling. Ei unik samlokalisering av dei ulike fagavdelingane styrkjer kompetansen innan klinisk søvnmedisin til beste for pasientgruppa.