Tumorgenomikk

Ved Tumorgenomikk nyttar me arvestoffbaserte teknikkar, det vil seie analysar av DNA og RNA, for å diagnostisere sjukdom.

Små mengder arvestoff blir isolert frå vevsprøver som er sende inn til Avdeling for patologi. Ved hjelp av teknikken PCR kopierer me opp det området av DNA-molekylet som er interessant, og deretter vert dette undersøkt for genfeil (mutasjonar). For å synleggjere mutasjonane nyttar me metodar som gelelektroforese, sanntids-PCR og DNA-sekvensering.

Arbeidet ved laboratoriet vårt er i første rekkje knytt til kreftdiagnostikk. Prøvesvara kan seie om pasienten har kreft eller ein godarta tilstand, kva type kreft pasienten eventuelt har, og kva behandling han/ho i så fall bør få. Dei siste åra har det dessuten  vore ei stor auke i analysar som avgjer bruk av nye, målretta medikament i behandling av visse typar svulstar.

Ved seksjon for Tumorgenomikk arbeidar bioingeniørar, molekylærbiologar, professor og patologar. Me har tett samarbeid med Avdeling for patologi og jobbar i hovudsak med følgjande problemstillingar:

• PCR, fragmentanalysar, Sangersekvensering og djupsekvensering (NGS) av kreftsvulstar for å sjå på genetiske endringar på nukleinsyrenivå.
• Multipleks digital kvantifisering (Nanostring) av RNA-uttrykk i kreftsvulstar for å sjå på genetiske endringar på nukleinsyrenivå.
• Fluorescens in situ hybridisering (FISH) av kreftsvulstar for å undersøkje genetiske endringar på kromosomnivå.