TARGET-EBV i MS-studien: Målretta behandling mot Epstein–Barr-virus ved multippel sklerose

Forsking dei siste åra har vist at Epstein–Barr-virus (EBV) truleg spelar ei viktig rolle i utviklinga av multippel sklerose (MS). Nesten alle som får MS har tidlegare vore smitta med viruset, men forskarane veit framleis ikkje om EBV berre er med på å starte sjukdommen eller også bidreg til sjukdomsaktivitet over tid.

TARGET-EBV i MS-studien skal undersøkje om antiviral behandling retta mot EBV kan redusere sjukdomsaktivitet og beskytte nerveceller hos personar med MS.

Legemiddelet som blir undersøkt i studien heiter tenofovir alafenamid (TAF). Dette er eit velkjent antiviralt legemiddel som allereie blir brukt ved behandling av hepatitt B og i førebygging av HIV. Laboratoriestudiar har vist lovande resultat mot EBV, og forskarane ønskjer no å undersøkje om dette kan ha betydning for personar med MS.

Dersom behandling mot EBV viser seg å påverke sjukdomsaktiviteten ved MS, kan det gi viktig ny kunnskap om sjukdommen og opne for heilt nye behandlingsstrategiar i framtida.

Kva er målet med studien?

Målet er å finne ut om behandling med TAF kan:

• redusere skade på nerveceller hos personar med MS
• påverke sjukdomsaktiviteten positivt
• redusere teikn til betennelse i hjernen
• bidra til mindre utmatting (fatigue)
• gi ny kunnskap om samanhengen mellom Epstein–Barr-viruset og MS

Forskarane vil også undersøkje korleis behandlinga påverkar biologiske markørar (biomarkørar) som kan seie noko om sjukdomsutvikling og behandlingseffekt.

Korleis er studien bygd opp?

TARGET-EBV i MS er ein randomisert og placebokontrollert studie som involverer fleire sjukehus.

Deltakarane vil bli fordelte tilfeldig i to grupper:

• éi gruppe får TAF dagleg i 12 månader
• éi gruppe får placebo (narremedisin) i 12 månader

Verken deltakarane eller forskarane veit kven som får kva behandling medan studien pågår.

Om lag 60 personar med MS som allereie får anti-CD20-behandling, kan delta i studien. Deltakarane blir følgde tett gjennom studieperioden med kliniske undersøkingar, MR-undersøkingar og andre avanserte analysar.

Status

Studien er i førebuingsfasen. Første pasient er planlagt inkludert i august 2026.

Rekrutteringa er venta å vare i om lag eitt år, og deltakarane vil bli følgde i 12 månader. Studien er planlagt avslutta i 2028.

Deltakande sentre

Norge

• Oslo universitetssjukehus, Oslo
• Haukeland universitetssjukehus, Bergen
• Vestre Viken, Drammen
• Akershus universitetssjukehus, Lørenskog
• Stavanger universitetssjukehus, Stavanger

Finland

• Turku PET Centre, Turku

Finansiering

Studien er støtta av:

• Horizon Europe
• Noregs forskingsråd gjennom Neuro-SysMed
• Oslo universitetssjukehus
• Haukeland universitetssjukehus
• Universitetet i Bergen
• Deltakande sjukehus
• Gilead Sciences, USA

Kontakt

For meir informasjon om studien, ta kontakt med:

neurosysmedstudier@helse-bergen.no