Regionalt senter for kjønnsinkongruens Vest
Regionalt senter for kjønnsinkongruens Vest (RSKI Vest) behandlar pasientar opp til 18 år.
Pasientar over 18 år kan tilvisast for rekvirering av behandlingshjelpemiddel. For behandling av pasientar over 18 år skal tilvisinga sendast til Nasjonal behandlingsteneste for kjønnsinkongruens (NBTK) ved Oslo universitetssjukehus HF.
Fastlege, annan spesialisthelseteneste eller psykolog/barnevernsleiar i kommunen kan vise til RSKI Vest.
Tilvisinga skal innehalde:
- Opplevd kjønnsidentitet
- Varigheit av kjønnsinkongruens
- Eventuell dysfori/ubehag
- Livssituasjon – familie, skule, arbeid
- Skildring av eventuelle helseplager – somatiske og psykiske (tidlegare og noverande)
- Pubertetsstatus
- Ønske og forventningar pasienten har til kontakt med RSKI
- Namn på fastlege
Ved psykiske vanskar av moderat eller alvorleg grad, der psykisk helsevern ikkje allereie er involvert, skal det òg sendast tilvising til lokal BUP.
Elektronisk tilvising blir sendt til RSKI Vest eller til Helse Bergen via Norsk Helsenett.
Tilbod ved senteret
Tilsette ved senteret er psykolog/koordinator, psykologspesialist og lege. Tilbodet blir tilpassa individuelt, basert på pasienten sine ønskje og behov. Det kan innehalde:
- Individuelle samtalar
- Gruppesamtalar
- Nettverks- og familiesamtalar
- Utprøving og rekvisisjon av hjelpemiddel
- Kurs og opplæring
Hormonell eller kirurgisk kjønnsbekreftande behandling blir tilbydd ved Nasjonal behandlingsteneste for kjønnsinkongruens (NBTK) ved Oslo universitetssjukehus. RSKI Vest samarbeider med NBTK og kan hjelpe til med tilvising og oppfølging av pasientar som er under utgreiing eller behandling der.
Rettleiing og samarbeid
Senteret kan kontaktast for konsultasjon og rettleiing i enkeltsaker. Send ein e-post med namn og telefonnummer til:
📧 rski-vest@helse-bergen.no
Vi tek kontakt så snart som mogleg.
RSKI Vest samarbeider med Nasjonal behandlingsteneste for kjønnsinkongruens, brukar- og interesseorganisasjonar, frivillige organisasjonar og kommunehelsetenesta i regionen.