Rusmedisin Korttidspost Engenhuset

Vi tek i mot pasientar etter tilvising og overføringar frå andre postar i sjukehuset på dagtid etter drøfting/avtale. Tilvisingar blir vurderte i tverrfaglegteam kvar veke.  

Avdeling for rusmedisin tek imot og behandlar alle tilvisingar til tverrfagleg spesialisert rusbehandling (TSB) i Helse Bergen sitt opptaksområde

Vi tilbyr ei heilskapleg tilnærming til behandling, som omfattar både medisinsk avrusing og fokus på det psykososiale miljøet. Vi jobbar for at du skal få eit best mogleg opphald.

• Medisinsk avrusing:
  Vi tilbyr observasjon, nedtrapping og abstinensbehandling.

• Psykososialt miljø:
  Vi er opptekne av å skape eit trygt og godt miljø på avdelinga, og legg til rette for at du skal få støtte i ei utfordrande fase.

• Støtte i utfordrande fasar:
  Når du kjem til oss, kan det vere at du er i aktiv rus eller har behov for avklaring. Vi legg til rette for at du skal få hjelp til å bli klar for eventuell vidare behandling.

• Kunnskap om kroppens reaksjonar:
  Vi har god forståing for korleis kroppen og hjernen reagerer på å "gå av" ulike rusmiddel, og vi er trygge fagpersonar i denne fasen.

• Relasjonsbygging:
  Relasjonsbygging er ein grunnpilar i alt vi gjer. Vi trur at det å bygge ein relasjon til kvar enkelt pasient er nøkkelen til god behandling.

Når den mest akutte avrusingsfasen er over, samarbeider vi med deg for å finne vegen vidare i behandling, dersom det er det du ønskjer.

Eksterne aktørar og aktivitetstilbod:

Vi tilbyr tematimar der eksterne aktørar besøker oss og presenterer sitt tilbod innan ettervern og aktivitet.

Fagleg oppdatering og førebygging:

Personalet deltek jamleg i HLR-undervisning og får opplæring i bruk av nalokson-nesespray (nyxoid) og overdoseførebygging.

Fysisk aktivitet og terapi:

• Vi tilbyr trening, turar og avspenning med treningsterapeut.
• Musikkterapi blir tilbydd både individuelt og i gruppe.

Målsettinga for behandlinga kan variere, men dei fleste ønskjer å bryte uheldige rusmønster og få hjelp til å starte gode endrings- og utviklingsprosessar.

Kanskje ønskjer du å gjere endringar i livet ditt, men er usikker på korleis du skal få det til. I dette arbeidet er det sentralt å auke bevisstheita på korleis rusproblemet påverkar deg sjølv, omgivnadene dine, eventuelt arbeidsplassen din og familiens situasjon.

Behandlinga byggjer på di eiga oppleving og din eigen beskrivelse av problema. Fokuset i behandlinga er ofte å kartlegge omfang og symptom, bevisstgjere deg på problema og oppretthalde motivasjonen for endring.

Behandlingsprosessen krev vesentleg eigeninnsats frå deg. Vi kan gjerne seie at behandlinga handlar om å hjelpe deg til å hjelpe deg sjølv.

Gjennom behandlingstilboda våre ønskjer vi å legge til rette for at du kan utforske nye meistringsopplevingar og finne tilbake til eit godt daglegliv. Eit viktig fokus i behandlinga er også å tilrettelegge for vidare meistring etter innlegginga. Dette kan innebere samarbeid med ulike hjelpetiltak, utarbeiding av individuell plan og/eller tilvising til vidare behandling.

Våre arbeidsmetodar byggjer på faglege tilnærmingar som motiverande samtale, mentaliseringsbasert terapi, kognitiv åtferdsterapi, sosialfagleg arbeid, treningsterapi, musikkterapi og god kunnskap om avhengigheit og endringsprosessar.

Det tek tid å endre rusbruk og livsmønster, og vi tilrår derfor at pasientane får oppfølging etter innlegginga ved Korttidspost Engenhuset. Ofte er problema samansette, og rusproblemet kan vere knytt til psykiske lidingar, traume og ein vanskeleg livssituasjon. Då er det nyttig å gjere eit sorteringsarbeid saman med behandlaren, der ein drøftar kva område som bør arbeidast med under innlegginga, og kva område som kan takast opp etter utskriving.

Saman med behandlingsansvarleg kan de vurdere behovet for vidare behandling og oppfølging.

Når du skrivast ut, utarbeidar vi ein oppsummerande rapport om opphaldet ditt. Denne blir sendt til instansen som har tilvist deg til behandling, og som regel også til fastlegen din. Du får moglegheit til å lese igjennom epikrisen/utgreiingsrapporten saman med behandlaren din, og du vel sjølv kva samarbeidsinstansar denne skal sendast til.

.