Studie frå Neuro SysMed kåra til «Årets forskerinitierte studie»
OVERLORD MS-studien, leia av MS-gruppa ved Neuro-SysMed på Haukeland universitetssjukehus og Universitetet i Bergen, er tildelt prisen «Årets forskerinitierte studie» under den nasjonale utdelinga Pris for fremragende innsats i kliniske studier 2025. Prisen blei delt ut på Grand Hotel i Oslo 29. januar 2026.
Foto: Neuro-SysMed
Utmerkinga er del av ei ny, nasjonal prisordning etablert av NorTrials, LMI, Melanor, Inven2, NorCRIN og CONNECT. Prisen skal løfte fram personar og fagmiljø som gjennom forsking og engasjement bidreg til kliniske studiar av høg kvalitet i Norge. Juryen mottok rundt 100 nominasjonar fordelt på seks kategoriar.
Ein studie med stor betydning for både pasientar og helsetenesta
OVERLORD‑MS samanliknar effekten av to MS‑behandlingar: det rimelegare off‑label‑legemiddelet rituksimab og det etablerte, men kostbare okrelizumab. Studien ble gjennomført som ein randomisert, dobbeltblinda non‑inferiority‑studie med over 200 deltakarar frå tolv sjukehus i Norge og Sverige.
Resultata viser at rituksimab kan gje like god behandlingseffekt som okrelizumab hos pasientar med nydiagnostisert attakkvis MS. Juryen framheva at studien kombinerer pasientnytte med samfunnsnytte, både gjennom betre behandlingsmoglegheiter og store kostnadsinnsparingar for helsetenesta. Studien trekkast også fram for sin solide metodiske kvalitet og effektiv gjennomføring.
Internasjonal oppmerksemd
OVERLORD‑MS har fått stor internasjonal oppmerksemd og bidreg til å styrke Norges posisjon innan MS‑forsking. I ei tid der mange land søkjer kostnadseffektive og berekraftige løysingar, viser studien korleis forskarinitierte prosjekt kan levere kunnskap som raskt får betydning for både klinisk praksis og helsepolitikk. Rituksimab er no allereie teke inn i dei nasjonale retningslinjene for førstelinjebehandling av MS.
Vi gratulerer forskingsgruppa med denne store anerkjenninga som speglar det sterke og langsiktige arbeidet som er lagt ned gjennom fleire år!