Langtidsplan for Helse Bergen-barnehagar 2026 - 2029 

Ein god barnehagekvardag 

Ein god kvardag i barnehagen handlar om trygge relasjonar, gode rutinar, leik og meiningsfulle aktivitetar gjennom dagen. Barna skal møte vaksne som ser, høyrer og støttar dei, og som bidreg til omsorg, fellesskap, trivsel, læring og utvikling. 

I Helse Bergen sine barnehagar skal alle barn oppleve ein trygg, inkluderande og meiningsfull kvardag. Gjennom leik, læring og gode relasjonar skal barna få utvikle seg, utforske verda rundt seg og oppleve meistring. Vi ønskjer å gi barna ein god barndom og eit pedagogisk tilbod av høg kvalitet, der omsorg, trivsel og utvikling står i sentrum. 

Barn og foreldre skal møte medarbeidarar som er pålitelege, imøtekomande og løysingsorienterte. Vi legg også vekt på verdiane lagånd og enkelheit, og vi trur på betydninga av godt samarbeid og samhandling for å skape dei beste rammene for barnas kvardag. Når vi støttar og lærer av kvarandre, blir vi betre saman. 

Barnegruppa i våre barnehagar er mangfaldig, og kvart barn skal bli møtt med respekt, omsorg og anerkjenning for den dei er. Alle barn skal kjenne at dei høyrer til i fellesskapet og få eit likeverdig tilbod tilpassa eigne behov, interesser og føresetnader. Vi ønskjer å styrkje barnas omsorg for seg sjølve, for andre menneske og for miljøet rundt dei. 

Personalet skal vere nærverande og engasjerte vaksne som kjenner barna godt. Gjennom å ta utgangspunkt i barnas interesser, nysgjerrigheit og erfaringar skal vi inspirere til leik, utforsking, læring og nye opplevingar. Barnas stemmer og perspektiv skal bli lytta til og verdsette i det daglege arbeidet. 

Overordna mål 

Kvart barn skal bli sett, høyrt og utfordra ut frå eigne føresetnader, og oppleve tryggleik, tilhøyrsle, meistring og utvikling i eit inkluderande fellesskap.

Saman for tryggleik og trivsel for barn 

Helse Bergen-barnehagane har søkt om og fått tildelt kompetansemidlar frå Statsforvaltaren til eit treårig utviklingsarbeid med tittelen «Saman for tryggleik og trivsel for barn». Tiltaket skal bidra til å styrkje arbeidet med det psykososiale barnehagemiljøet til barna og sikre at alle barn opplever tryggleik, trivsel, tilhøyrsle og gode relasjonar i barnehagen. 

Overordna mål for utviklingsprosjektet er: 

Trygge, inkluderande barnehagemiljø for alle barn – gjennom systematisk kompetanseutvikling og styrkt praksis. 

Som samarbeidspartnar i prosjektet har barnehagane fått tilknytt Høgskolen NLA, som skal bidra med kompetanseheving, fagleg rettleiing og støtte gjennom heile prosjektperioden. Målet er å styrkje kompetansen til dei tilsette og vidareutvikle ein inkluderande praksis som fremjar trivsel, fellesskap og psykososial utvikling hos barna. 

Prosjektet blir gjennomført over tre år og omfattar alle tilsette i barnehagane til Helse Bergen. Innanfor det overordna temaet i prosjektet skal kvar barnehage arbeide med eigne årlege satsingsområde, tilpassa behova og utviklingsmåla til barnehagen. Dette skal bidra til målretta kompetanseutvikling og samtidig sikre at ny kunnskap blir omsett til praksis i den enkelte barnehagen. 

Gjennom prosjektet ønskjer vi å vidareutvikle kvaliteten i barnehagetilbodet slik at alle barn møter trygge, kompetente og medvitne vaksne. 

Helse Bergen-barnehagane har søkt om og motteke midlar frå Erasmus+, Europa sitt største program for internasjonalt samarbeid innan utdanning og kompetanseutvikling. Programmet skal bidra til kvalitetsutvikling, inkludering og innovasjon, og gir oss moglegheit til å lære saman med barnehagar og utdanningsinstitusjonar i andre europeiske land. 

Som ein del av satsinga vår på livsmeistring og helse er vi no akkrediterte i Erasmus+ for dei neste fem åra. Det betyr at vi kvart år får støtte til internasjonalt samarbeid og kompetanseutvikling. I denne perioden vil fleire av dei tilsette få høve til å delta på studiebesøk og praksisutveksling i andre land for å observere, lære og hente inspirasjon frå ulike måtar å arbeide på. 

Gjennom møte med barnehagar og fagmiljø internasjonalt får vi nye perspektiv og idear som kan styrkje arbeidet vårt. Samtidig gir det oss moglegheit til å reflektere over eigen praksis og vidareutvikle kvaliteten i tilbodet vi gir barna. 

Barnehagen har ei viktig rolle i å leggje grunnlaget for trivsel, læring og utvikling hos barna. Erfaringane barna får i barnehagen, har betydning for moglegheitene dei møter seinare i livet. Både FNs barnekonvensjon og Rammeplan for barnehagen understrekar betydninga av å fremje fysisk og psykisk helse, tilhøyrsle og livsmeistring hos barn. 

Vi ser derfor internasjonalt samarbeid som ein viktig del av utviklingsarbeidet vårt. Kunnskapen og erfaringane vi får gjennom Erasmus+, skal kome både barn, tilsette og barnehagefellesskapet til gode, og bidra til å styrkje arbeidet med trygge, inkluderande og helsefremjande barnehagemiljø. 

Vaksne som ser barna 

Ein god kvardag for barna blir skapt av vaksne som er medvitne om rolla si i møte med behova, kjenslene og utviklinga til barna. Kvaliteten i relasjonar, kommunikasjon og samspel er avgjerande for trivsel, leik, læring og meistring gjennom heile dagen. 

Vaksenrolla i barnehagane våre er kjenneteikna av høg relasjonskompetanse. Personalet skal vere engasjerte, til stades, varme og føreseielege, og arbeide systematisk for at alle barn opplever å bli sett, høyrde og forstått. 

Dette inneber at vaksne: 

• tek ansvar for gode relasjonar til kvart enkelt barn 

• følgjer initiativa til barna og er tett på i leik, rutinar og overgangar 

• lyttar aktivt og kommuniserer med nærvær, respekt og tydelegheit 

• stadfestar kjenslene til barna og støttar dei i å setje ord på opplevingar

• er tydelege rollemodellar som viser omsorg, samarbeid og respekt i praksis 

Kvardagsrutinar som pedagogisk arena

Kvardagsrutinane er prega av omsorg, tid, føreseielegheit og gode relasjonar. Rutinane blir brukte som læringsmoglegheiter som gir barna tryggleik, deltaking og meistring. 

• Påkleding som arena for sjølvstende og språk 

• Måltid som roleg stund for dialog, fellesskap og matglede 

• Utetid som arena for meistring, fysisk aktivitet, samspel og naturglede 

• Rutinar som trygge rammer der barna kan delta aktivt 

Leik, læring og fellesskap 

Leik er ein sentral del av kvardagen til barna og ein viktig arena for læring, utvikling og sosialt samspel.

• Språk, relasjonar og sosiale ferdigheiter 

• Utforsking, undring og kreativitet 

• Samarbeid og konfliktløysing 

Meistring og livsmeistring 

Meistring handlar om å få prøve, øve, feile og prøve på nytt i trygge omgivnader. 

• Små og store meistringsaugeblink kvar dag

• Støtte til å tole motgang

• Ansvar i tråd med eige utviklingsnivå. Leik, læring og fellesskap gir barna trygge erfaringar med meistring

Stemmen til barna 

Barn skal oppleve at tankar, behov og perspektiv blir lytta til, tekne på alvor og brukte aktivt i barnehagekvardagen. 

Medverknad handlar om at personalet tolkar, lyttar og responderer på dei verbale og nonverbale uttrykka til barna, slik at barna får reell innverknad innanfor trygge og ansvarlege rammer. 

I praksis betyr det at personalet: 

• følgjer initiativa og interessene til barna 

• gir barna valmoglegheiter innanfor trygge rammer 

• bruker observasjon, samtale og leik for å forstå perspektiva til barna 

• lèt undringa til barna prege vidare aktivitetar og prosjektInteressene til barna kan danne utgangspunkt for vidare arbeid ute og inne. 

Kjensleregulering og livsmeistring 

Når barna får støtte til å forstå og uttrykkje eigne og andre sine kjensler, blir både tryggleik, sjølvkjensle og livsmeistring styrkte. 

• Setje ord på kjensler 

• Hjelpe barna med å regulere seg 

• Kjenne att eigne og andre sine kjensler 

• Stå i kjensla saman med barnet 

Inkludering og fellesskap 

I barnehagane våre skal alle barn oppleve at dei er ein viktig del av fellesskapet, blir inkluderte i leik og aktivitetar, og blir sett, høyrde og forstått. 

Personalet arbeider aktivt med å styrkje venskap, skape felles opplevingar, førebyggje mobbing og sikre trygge leike- og læringsmiljø. 

Overgangar i barnehagen 

I løpet av barnehagetida kan barna oppleve overgangar mellom avdelingar, til dømes til ei ny gruppe. Vi arbeider aktivt for at desse overgangane skal vere trygge og gode for både barn og føresette. Personalet samarbeider tett for å leggje til rette for fellesskap, inkludering og tilhøyrsle i nye grupper. 

Barnehagen er ein heilskap, og vi ønskjer at alle tilsette skal kjenne alle barna. Når eit barn skal byte avdeling, får barnet og familien høve til å bli kjende med både barn og vaksne på den nye avdelinga. Pedagogisk leiar sørgjer, i dialog med føresette, for at relevant informasjon blir vidareført slik at barnet får ein best mogleg start på den nye avdelinga. 

Overgang frå barnehage til skule og SFO 

Det siste året i barnehagen legg vi ekstra vekt på å førebu barna på overgangen til skule og SFO. Målet er at barna skal møte den nye kvardagen med glede, tryggleik og tru på eigne evner. 

Gjennom leik, utforsking og samarbeid får barna erfaringar som styrkjer sjølvstende og meistring. Dei blir gradvis oppmoda til å ta meir ansvar for eigne gjeremål, som måltid, påkleding og toalettbesøk. 

Barna i våre barnehagar skal begynne på ulike skular, og samarbeidet med skulane vil derfor variere. Når det er behov for å dele informasjon om enkeltbarn for å sikre ein god overgang, skjer dette alltid i samarbeid med og etter samtykke frå føresette. Saman arbeider vi for at overgangen til skule og SFO skal bli så trygg og positiv som mogleg for kvart enkelt barn. 

Barnehagen samarbeider med føresette og ulike instansar med barnas beste i fokus.

Målet med foreldresamarbeidet er å skape gjensidig forståing for barnet sine behov og fellesskapet i barnegruppa. Dette byggjer på openheit, tillit og likeverd. Dagleg kontakt ved levering og henting, foreldresamtalar og foreldremøte er viktige møteplassar for samarbeid mellom heim og barnehage. Skriftleg informasjon blir formidla gjennom den digitale plattforma. 

Helse Bergen sine barnehagar deltek i forskingsprosjektet Dialogbasert tidleg oppdaging, leia av Ingvar Bjelland ved Helse Bergen. Prosjektet skal undersøkje om systematiske samtalar mellom foreldre og pedagogar kan bidra til å oppdage barn som treng ekstra oppfølging knytt til kjensler eller åtferd. Før foreldresamtalen fyller både føresette og pedagog ut eit spørjeskjema som dannar grunnlag for dialog og eventuelle tiltak. Deltaking er frivillig. 

Barnehagane har foreldreråd, FAU og samarbeidsutval (SU). Foreldrerådet består av alle føresette, FAU er valt av foreldrerådet, og SU er samansett av representantar frå foreldre, tilsette og eigar. SU er eit rådgivande og samordnande organ som skal behandle saker av betydning for barnehagen. 

Føresette blir også inviterte til å delta i UDIR si nasjonale brukarundersøking. Tilbakemeldingane er viktige bidrag til vidare kvalitetsutvikling av barnehagane våre. 

Høgskulen på Vestlandet (HVL) og Høgskulen NLA 

Helse Bergen har samarbeidsavtalar med både Høgskulen på Vestlandet (HVL) og Høgskulen NLA om praksisopplæring for studentar frå barnehagelærarutdanninga. Fleire av barnehagane tek imot studentar i praksis gjennom året og bidreg slik til utdanning og utvikling av framtidige barnehagelærarar. 

Gjennom utviklingsarbeid og kompetanseheving samarbeider barnehagane også med Høgskulen NLA om fagleg utvikling og kvalitetsarbeid knytt til trygge og inkluderande barnehagemiljø. 

Lærebedrift 

Barnehagane i Helse Bergen er godkjende lærebedrifter for lærlingar i barne- og ungdomsarbeidarfaget. Vi ønskjer å gi lærlingane eit godt grunnlag for vidare yrkesutøving gjennom rettleiing, fagleg oppfølging og praktisk erfaring. 

Pedagogisk-psykologisk teneste (PPT) 

I samarbeid med føresette kan barnehagen kontakte og samarbeide med PPT eller andre relevante hjelpeinstansar når barn har behov for særskild støtte, rettleiing eller tilrettelegging. 

Barneverntenesta 

Barnehagen har eit lovpålagt ansvar for å vere merksam på forhold som kan gi grunnlag for tiltak frå barneverntenesta. Dersom det er grunn til å tru at eit barn blir utsett for vald, mishandling, alvorleg omsorgssvikt eller andre forhold som gir grunnlag for bekymring, har barnehagen opplysningsplikt til barneverntenesta i tråd med gjeldande lovverk. Opplysningar blir som hovudregel gitt av styrar. 

HMS, rutinar og beredskap 

Barnehagane i Helse Bergen arbeider systematisk for å sikre eit trygt og godt miljø for barn og tilsette. Vi har etablerte rutinar, retningslinjer og beredskapsplanar knytte til mellom anna barn si tryggleik, omsorg og trivsel. Det interne HMS-systemet blir nytta som eit sentralt verktøy i dette arbeidet. 

Fagområda i rammeplanen 

Dei sju fagområda i rammeplanen blir sette i samanheng og er ein gjennomgåande del av innhaldet i barnehagen. Bruk knappane under for å gå direkte til omtalen frå Utdanningsdirektoratet av kvart fagområde.