Ressursteam i Akuttmedisinsk Avdeling

Dei tilsette i ressursteamet jobbar i ambulansetenesta på lik linje med anna ambulansepersonell i avdelinga. Dei har same oppgåver, og har faste stillingar med fast oppmøtestad i Åsane ambulansestasjon. Dei arbeider etter ein fast turnus med arbeid kvar tredje helg, og det er kun dagtidsarbeid. Kurs og fagtimar vert lagt i turnus som for alle ansatte i avdelinga.

Korleis jobbar ressursteamet?

Ressursteamet er meint å dekkje opp for akutt fråvere i heile ambulansetenesta, og det er derfor naturleg at ein arbeider ved alle ambulansestasjonar i avdelinga. Sidan ein følgjer ein fast turnus som er bygd på 12-timarsvakter, er det først og fremst aktive stasjonar som vert aktuelle.

Dei tilsette i ressursteamet får beskjed dagen før eller same dag om kor ein skal arbeide den aktuelle vakta. Dei kan då velje å møte direkte dersom det er mest hensiktsmessig, men i utgangspunktet møter dei i Åsane ambulansestasjon og kan køyre med reservebil til rett stad eller verte plukka opp av makker. Som hovudregel er ein tilbake i oppmøtestasjon når vakta er slutt.

Kva er fordelane for teammedlemmene?

Fordelane kan vere fleire. Ein får brei kjennskap til heile ambulansetenesta, og kan få variasjon i oppdragsprofil og belastningsgrad frå stasjonar med høg aktivitet til stasjonar med mindre aktivitet. Ein får prøvd ulike arbeidsmiljø og kan bidra til å knyte band mellom dei ulike ambulanseseksjonane, og ta med seg det beste frå alle arbeidsmiljø vidare i tenesta.

For dei som ønskjer å sleppe nattevakter, er desse stillingane ideelle då dei ikkje har nattevaktar i turnus.

Raske fakta om ressursteamet

• Arbeidsstad: Heile ambulansetenesta, ein vert plassert etter behov
  
  
• Oppmøtestad: Som hovudregel er Åsane ambulansestasjon oppmøtestad
  
  
• Organisering: Ressursteamet vert organisert under Ambulanse seksjon Nord, og har sin næraste leiar der
  
  
• Arbeidstid: Dagtid og kvar tredje helg
  
  
• Oppgåver: Som for ambulansetenesta elles
  
  
• Kompetanse: Som for ambulansetenesta elles