Kreft med ukjent utgangspunkt (CUP) er ein sjeldan og krevjande krefttype. Sjukdomen er kjenneteikna ved spreiing av kreftceller utan at ein finn opphavet til svulsten, noko som gjer både diagnostikk og behandling vanskeleg. I dag har vi avgrensa kunnskap om korleis desse pasientane blir utgreidde og behandla, og prognosen er ofte dårleg.
Om forskinga
Forskinga i NorCORG undersøker korleis avanserte genanalysar, kunstig intelligens og moderne patologi kan kombinerast for å identifisere kreftsjukdomens opphav og gi meir målretta og persontilpassa behandling. I tillegg vil vi implementere og evaluere nytten av eit molekylært tverrfagleg team (MDT)-møte for CUP-pasientar – eit tilbod som ikkje finst i dag. Dette vil gi ei strukturert og heilskapleg vurdering av kvar pasient, sikre at ekspertise frå ulike fagområde blir involvert og legge grunnlaget for betre behandlingsval.
Samfunnsnytte
Arbeidet til NorCORG gir håp til ei pasientgruppe med få behandlingsalternativ. Betre diagnostikk og persontilpassa behandling kan gi raskare og meir målretta behandling, og betre livskvalitet og prognose. Innføring av molekylære MDT-møte for CUP-pasientar sikrar heilskapleg vurdering og betre beslutningsgrunnlag, og bidreg til meir likeverdig og kvalitetssikra behandling. Forskninga styrkjer òg grunnlaget for nasjonale retningsliner og meir effektiv bruk av ressursar.