Om nettverket ART-FORSEE
ART-FORSEE har som mål å byggje ei sterk kopling mellom forsking og pasientbehandling; både i prosjektperioden og på lang sikt.
Styrken til det regionale nettverket ART-FORSEE ligg i eit tett samarbeid mellom fagmiljø med høg kompetanse innan klinisk stråleterapi, teknologi og forsking. Nettverket er solid forankra i klinisk praksis og omfattar ei brei tverrfagleg gruppe av stråleterapeutar, medisinske fysikarar, legar og doseplanleggjarar med felles interesse og utfyllande kompetanse innan strålebehandling og medisinsk teknologi. I tillegg deltek ein brukarrepresentant i prosjektet, som spelar ei viktig rolle i å løfte fram pasientperspektivet.
Ved Stavanger universitetssjukehus er det brei klinisk erfaring og eit sterkt fokus på å forbetre lindrande behandling (palliasjon). Haukeland universitetssjukehus har lang forskingserfaring og spesialkompetanse innan både adaptiv strålebehandling og protonterapi. BioProton-gruppa ved Universitetet i Bergen er ekspertar på biologiske usikkerheiter ved protonterapi, medan NOVO-gruppa ved Høgskulen på Vestlandet utviklar ny teknologi for rekkjeviddeverifikasjon i eit tilknytt EU-innovasjonsprosjekt.
Dei nye metodane som blir utvikla i prosjektet, skal takast i bruk ved begge sjukehus når det er relevant. Fire doktorgradsstudentar vil vere tilknytte forskingsarbeidet og bidra til ny kunnskap. For å sikre at ny kunnskap kjem pasientane til gode, vil det bli arrangert årlege work shops og seminar der både forskarar, brukar og klinisk personale deltek. Dette skal styrkje samarbeidet mellom forsking og behandling, sikre pasientperspektivet og bidra til at ny kunnskap raskt blir tatt i bruk i praksis.
Meir om BioProton-gruppa ved universitet i Bergen
Kristian Smeland Ytre-Hauge er professor i medisinsk fysikk ved institutt for fysikk og teknologi ved Universitetet i Bergen. Ytre-Hauge forskar på eit breitt spekter av problemstillingar innan protonterapi med spesielt fokus på variasjonar i biologisk effektivitet av protonar. Proton har ein høgare relativ biologisk effektivitet enn tradisjonell stråleterapi. Dette betyr at for same stråledose, (mengde avsett energi i vevet) vil proton vere meir effektiv enn standard strålebehandling. Det er likevel usikkerheiter rundt kor mykje meir effektiv protonstrålinga er. Dette hindrar oss i dag frå å utnytte det fulle potensialet til protonterapi.
I ART-FORSEE vil vi forske på korleis vi betre kan estimere denne RBE faktoren og utvikle metodar for å ta omsyn til denne undervegs i protonbehandlinga.
Meir om NOVO gruppa ved Høgskulen på Vestlandet
Ilker Meric er førsteamanuensis ved Høgskulen på Vestlandet. Forskinga hans er retta mot detektorteknologi, eksperimentell fysikk og avanserte simuleringar. Han er prosjektleiar for NOVO (Next Generation Imaging for Real-time Dose Verification Enabling Adaptive Proton Therapy), som er eit europeisk prosjekt leia av Høgskulen på Vestlandet, med finansiering frå EIC (European Innovation Council) Pathfinder Open (prosjektnr.: 101130979) under EU sitt store forskingsprogram Horisont Europa. UiB og Helse Bergen deltek òg som partnarar i NOVO-prosjektet. Målet med prosjektet er å utvikle ein ny detektorteknologi som kan brukast til å estimere protonrekkjevidd og dose i sanntid medan ein protonbehandling pågår. Dette skal skje gjennom deteksjon og avbilding av sekundære prompt gamma-strålar og raske nøytron, som er biprodukt av behandlinga.
I ART-FORSEE skal sentrale deltakarar i NOVO-prosjektet òg vere med i utviklinga av det regionale nettverket, samt i arbeidet knytt til undersøkingar av korleis rekkjeviddeusikkerheit kan påverke adaptiv protonterapi.