Vi tilrår at du alltid nyttar siste versjon av nettlesaren din.
Studie av meir nøyaktig blodprøve ved mistanke om hjartesjukdom
Innføring av ny troponin T-analyse
Norske sjukehus skal gradvis ta i bruk ein ny analysemetode for måling av troponin T, som gir meir presise målingar. Studien skal undersøkje kva konsekvensar innføringa av den nye analysen har for pasientbehandling og diagnostikk i vanleg klinisk praksis.
Sykepleier gjør klart til blodprøvetaking
Mange pasientar som oppsøkjer akuttmottak på grunn av brystsmerter eller andre symptom på hjartesjukdom, får målt hjartemarkøren troponin i blodet. Troponin blir brukt for å påvise eller utelukke hjarteinfarkt og andre skadar på hjartemuskelen.
Den nye analysemetoden (6. generasjon høgsensitiv troponin T) kan måle svært låge troponinnivå meir presist enn i dag. Utgangspunktet for studien er at vi trur den nye metoden vil gjere det lettare å skilje mellom akutte og kroniske hjartetilstandar, føre til sikrare diagnostikk og bidra til betre oppfølging av pasientane.
I den pågåande studien skal vi undersøkje kva konsekvensar innføringa av den nye analysen har for pasientbehandling og diagnostikk i vanleg klinisk praksis, mellom anna førekomsten av diagnosar, behovet for vidare undersøkingar, behandling og pasientutfall.
Alle norske sjukehus som bruker troponin T-analysar i akuttmottak, blir inviterte til å delta i studien. Sjukehusa vil ta i bruk den nye analysen på ulike tidspunkt i løpet av studieperioden. Dette gjer det mogleg å samanlikne resultat frå perioden før og etter innføringa av den nye metoden.
Studien er basert på opplysningar som allereie blir registrerte i samband med ordinær pasientbehandling. Det skal ikkje takast ekstra blodprøver eller gjennomførast ekstra undersøkingar av pasientane som følgje av studien. Forskarane vil bruke informasjon frå sjukehusjournalar og kople desse saman med opplysningar frå nasjonale helseregister. Dette gjer det mogleg å undersøkje mellom anna førekomst av hjarteinfarkt, hjartebehandlingar og dødsfall etter eit sjukehusbesøk.
Studien bruker opplysningar som allereie blir registrerte i vanleg pasientbehandling, og krev ikkje ekstra blodprøver eller andre undersøkingar.
Forskarane vil kople informasjon frå sjukehusjournalar med opplysningar frå nasjonale helseregister. Dette gjer det mogleg å undersøkje mellom anna førekomsten av hjarteinfarkt, hjartebehandlingar og dødsfall etter eit sjukehusbesøk.
Studien er godkjend av Regional komité for medisinsk og helsefagleg forskingsetikk (REK ID 980736), og har fått fritak frå kravet om samtykke og løyve til å hente ut eit avgrensa tal personopplysningar som blir behandla i samsvar med gjeldande personvernregelverk. Data blir lagra på ein trygg måte, og resultata vil bli presenterte som grupperte tal slik at det ikkje er mogleg å kjenne att einskildpersonar.
Dersom du ønskjer å reservere deg mot at opplysningane dine blir brukte til forsking, kan du kontakte prosjektleiaren (sjå under «Kontakt»).
Studien blir leidd frå Haukeland universitetssjukehus og Universitetet i Bergen, i samarbeid med sjukehus, laboratorium og forskingsmiljø over heile landet. Målet er å skaffe kunnskap som kan bidra til betre diagnostikk og behandling av pasientar med mistanke om akutt hjartesjukdom i Noreg.
Studien blir også gjennomført i Danmark, og det vitskaplege arbeidet vil bli publisert som eit dansk-norsk samarbeid.
Ønskjer du meir informasjon kan du kontakte prosjektleiar:
