Vi tilrår at du alltid nyttar siste versjon av nettlesaren din.
Forsking på spiseforstyrrelser

BEAT (Bergen Eating disorder research group)

Forskningsgruppa har som mål å bidra med forsking som kan gi betre forståing av spiseforstyrringar og betre behandling av desse lidingane. Vi er involverte i prosjekt som undersøkjer symptom og etiologi, samsjuklegheit, utvikling og validering av kartleggingsinstrument, behandlingseffektar og biverknader, samt brukaropplevingar og -perspektiv ved sjukdom og behandling. Kliniske behandlingsstudiar utgjer hovudfokuset i forskingsporteføljen. Vidare arbeider vi med å identifisere biologiske markørar, inkludert genetiske og immunologiske markørar, som kan bidra til å forstå patofysiologien ved sjukdomen. Overspisingsliding er den spiseforstyrringa med høgast prevalens i dagens samfunn, og behandlingstilbodet har hatt tydelege manglar. Forsking knytt til denne lidinga har difor òg blitt eit viktig satsingsområde i prosjekta våre.

Om forskingsgruppa

Forskningsgruppa vart godkjend i 2023 av divisjonen sitt forskingsutval. Gruppa er eit samarbeid mellom Helse Bergen, Helse Fonna (ved psykologspesialist og ph.d. Ester Espeseth) og Universitetet i Bergen (ved professor Signe H. Stige og Yngvild S. Danielsen). Ho består av forskarar og fagpersonar med brei kompetanse innan psykologi, medisin, ernæring, fysioterapi og klinisk arbeid med spiseforstyrringar. To ph.d.-stipendiatar er hovudtilknytte gruppa, medan fire ph.d.-stipendiatar og ein postdoktor har sekundær tilknyting.

Sidan oppstarten har gruppa hatt særleg merksemd på å hente inn prosjektmidlar og delta i nasjonale og internasjonale samarbeid, med mål om auka publisering og fagleg utvikling. To stipendiatar og gruppeleiar har hatt forskingsopphald ved University of Sydney og InsideOut Institute for Eating Disorders i 2024–2025, der det òg er etablert samarbeid. Albertsen og Danielsen har i tillegg hatt eit kortare opphald ved Trinity College Dublin for å utvikle samarbeid om behandling av spiseforstyrringar.

Fleire i gruppa har òg vore involverte i etableringa av eit europeisk nettverk som arbeider med kartlegging og oppfølging av spiseforstyrringar ved høgare vekt. 

Førsteamanuensis og psykologspesialist Yngvild S. Danielsen har leiaransvaret for forskingsgruppa. Ute Kessler (overlege, ph.d.) og Liv Kleve (psykologspesialist, ph.d.) er nestleiarar. Kvalitetsrådgivar Helene Nilsen gir administrativ støtte til gruppa.
 

Regionalt forskingsregister og biobank

Ved Regional avdeling for spiseforstyrringar er det etablert eit regionalt kvalitets- og forskingsregister med tilhøyrande biobank. I 2024–2025 har det vore lagt ned eit omfattande arbeid med å utarbeide DPIA og å oppdatere og forbetre rutinane for registeret.

Det er òg arbeidd med å få på plass digitale løysingar for datainnsamling til det nasjonale registeret for behandling av spiseforstyrringar, NORSPIS (Norsk kvalitetsregister for behandling av spiseforstyrrelser - NORSPIS - Nordlandssykehuset HF.)

I åra framover er det eit mål å nytte data frå registeret og biobanken i forskingsaktiviteten knytt til forskingsgruppa for spiseforstyrringar.

Sist oppdatert 24.06.2026