Tildeling av midlar frå ADHD Forskningsnettverk 2025

Nasjonalt Forskningsnettverk for ADHD har sidan 2007 delt ut midlar til forskingsprosjekt som fremjar kunnskap og kompetanse om ADHD. Frå og med 2024 er det dei fire regionale kompetansetenestene og fagmiljøa for autisme, ADHD og Tourettes syndrom som har teke over ansvaret for tildeling og drift av nettverket frå NEVSOM.

For 2025 var det mogleg å søkje om støtte på inntil 400 000 kroner per prosjekt. Totalt kom det inn 13 søknader, og seks prosjekt har fått tildelt støtte etter vurdering frå bedømmingskomiteen. I alt vert det delt ut 1,8 millionar kroner til prosjekt som utmerkjer seg ved vitskapleg originalitet, gjennomførbarheit og klinisk relevans.

Komiteen har bestått av professor og overlege Kristin Romvig Øvergaard, overlege Mats Fredriksen, psykologspesialist Børge Mathiassen, professor og overlege Maj Britt Posserud, psykologspesialist Tonje Torske, professor Ingunn Mundal og seniorrådgivar Nina Holmen frå ADHD Norge. Som tidlegare år har komiteen hatt særleg merksemd på habilitetsspørsmål.

Følgjande prosjekt får støtte i 2025

• Hege Marie Egeland Noreng (Farmasøytisk institutt, UiO): Kan kvinner som bruker ADHD-legemidler amme? Kvantifisering av legemidler i morsmelk – kr 400 000

• Jacqueline Cohen (Folkehelseinstituttet): Lisdexamfetamine use in Norway and comparative safety with other ADHD medications – kr 280 000

• Ann Christin Andersen (NTNU): STAND Norge – kr 250 000

• Jutta Dierkes (UiB): Dietary habits, food intake and nutritional status in children with ADHD – kr 250 000

• Kristine Sirevåg (Solli DPS og Kronstad DPS): High-intensity training for adults with ADHD in specialised mental health care: A mixed-methods feasibility study – kr 400 000

• Anett Kaale (ISP/UiO): Studenter med ADHD, autisme og ADHD i høyere utdanning: Studieliv og tilrettelegging – kr 220 000

Prosjekta representerer eit breitt spekter av forsking som kan gje ny kunnskap om ADHD – frå biologiske og medisinske aspekt til levekår, utdanning og behandlingstilnærmingar.

Bodil Sjømæling (RKT HSØ)
Unni Sagstad (RFM Helse Midt)
Hege Ramsøy-Halle (RFM Vest)
Per Wilhelmsen (R-FAAT Helse Nord)