Personar som er avhengige av amfetamin eller metamfetamin har ei auka sjukdomsbelastning og fleire helseutfordringar. Infeksjonar, hjarte- og karsjukdomar og psykiske symptom er berre nokre av dei, i tillegg til auka risiko for død og redusert livskvalitet.

Effektive og evidensbaserte behandlingsmetodar for avhengigheit til amfetamin er per i dag mangelfulle. Det er derfor eit stort behov for å gjennomføre studiar som undersøker ulike behandlingsmetodar, og denne studien skal bidra til dette.

Studien undersøker om behandling med dekstroamfetamin (DXA) kan hjelpe personar med langvarig avhengigheit av illegale sentralstimulerande stoff. Vi ønskjer å inkludere både pasientar som får legemiddelassistert rehabilitering (LAR) og personar som ikkje får slik oppfølging.

Studien vil ha fokus på effekt og tryggleik ved ei slik behandling.

Studien er ein dobbeltblind, placebokontrollert multisenterstudie. Dette betyr:

Deltakarar frå fleire stader i Noreg blir tilfeldig fordelt i to grupper.
Éi gruppe får dekstroamfetamin (DXA) i 12 veker.
Den andre gruppa får placebo (PBO) i 12 veker.
Verken deltakarane, behandlarane eller forskarane veit kven som får kva.

Deltakarane blir randomisert til éin av to mogelege studiearmar:

DXA – deltakarane får dekstroamfetamin i 12 veker
PBO – deltakarane får placebo i 12 veker

Oppfølging i studien:

Intervju med studiesjukepleiar før oppstart, to gonger undervegs og éin gong etter 12 veker.
Ukentleg oppfølging av helsepersonell.
Urinprøve éin gong i månaden under tilsyn.
Spytt-, hår- og blodprøver blir tekne i løpet av studien.

Alle deltakarane vil få god oppfølging av studiepersonell.

Målet med studien:

Redusere bruk av illegale amfetamin.
Sjå om kontrollert bruk av dekstroamfetamin kan gi betre livskvalitet, færre psykiske plager, mindre injeksjonsskadar og lågare risiko for overdose og psykose.

Ved å delta kan du bidra til betre behandling for amfetaminavhengigheit – både i Noreg og internasjonalt.