Hysteroskopi er ei undersøking/prosedyre for å greie ut og behandle tilstandar i livmora ved hjelp av eit lite endoskopisk kamera (hysteroskop). Ved hysteroskopi blir innsida av livmorhòla og livmorslimhinna undersøkt, ved å føre eit tynt kamera gjennom skjeden og vidare inn i livmorhòla.
Under prosedyren kan ein diagnostisere problemstillingar inne i livmorhòla. I fleire tilfelle kan ein samtidig direkte gå vidare med å utføre tiltenkt behandling eller ta vevsprøver. Under prosedyren kan det vere behov for å byte til eit meir allsidig kamerainstrument med noko større diameter.
Prosedyren blir utført poliklinisk og tar ca. 10-30 minutt, litt avhengig av kva som skal utførast.
Førebuingar
- For å minske ubehag og smerter under prosedyren, skal du ta 400 mg Ibux og 2 g paracet 1-2 timar i forkant. Begge er reseptfrie medisinar.
- Det er viktig at vi avkreftar at du er gravid før inngrepet. Ta ein graviditetstest på morgonen same dagen som inngrepet.
- Du treng ikkje å faste før prosedyren, du kan ete og drikke som normalt.
- Det kan vere nødvendig med ekstra smertestillande under prosedyren. I så tilfelle kan du ikkje køyre bil etterpå.
- Om mogleg planlegg vi undersøkinga til dei to første vekene i menstruasjonssyklusen for å oppnå beste vilkår for undersøkinga (syklusen begynner ved første blødingsdag). Menstruasjonsbløding er ikkje eit hinder for å få utført prosedyren, men kraftig bløding kan vere ei ulempe ved undersøkinga.
