B4DT i Singapore

I Singapore er interessa stor for betre OCD-behandling og for å bruke same tilnærming til andre lidingar. Vi samarbeider med det sterkaste fagmiljøet i landet, Institute of Mental Health (IMH). Her har dei tredjelinjeteneste, og arbeidet har solid forankring både i leiinga og blant behandlarane.

Då IMH inviterte til førelesing om arbeidet vårt, meldte over 500 behandlarar seg på. Dei skildrar det same som mange andre stader – det er stort behov for å ta grep for å hjelpe fleire, og viljen er der!

Behovet for meir kunnskap er stort, og til sjuande og sist handlar dette om éin ting – å sikre at endå fleire som blir råka av angst og tvangsliding (OCD) får tilgang til hjelp som faktisk hjelper. Det betyr å ta i bruk dei løysingane vi allereie har, samstundes som vi jobbar systematisk for å utvikle stadig betre behandlingstilbod.

For å heidre utvalde samarbeidspartnarar hender det at IMH i Singapore arrangerer ein seremoni der sjukehusleiinga, saman med den som blir heidra, plantar eit tre utanfor hovudinngangen. Treet får eit eige skilt med namnet til personen dei ønskjer å ære. Denne gongen var det Bjarne sin tur til å få sitt eige tre! Ei stor ære!

Tusen takk til Kavli, som gjer det mogleg for oss å gjere ein forskjell for så mange menneske – i stadig fleire land.