Brukarperspektivet er sentralt i ny nasjonal studie om traumebehandling
Den nasjonale kliniske behandlingsstudien KIT (the Key to Integrated Trauma treatment in psychosis), leia frå Haukeland universitetssjukehus, undersøker effekten av å gi traumebehandling ved psykoselidingar. Ved hjelp av PEK (Psykoseforsking med erfaringskompetanse) og Erfaringspanel psykisk helse og rus, er det utvikla eit eige prosjekt i KIT der alle problemstillingane er valde av menneske med levd erfaring frå psykose.
Brukarmedverknad har vore avgjerande
Prosjektet har nyleg fått midlar frå DAM gjennom Rådet for psykisk helse til å undersøkje om traumebehandling påverkar subjektive bedringsprosessar (recovery), og om effekten av traumebehandlinga blir påverka av terapialliansen og støtte frå pårørande.
– PEK og erfaringspanelet har òg vore avgjerande for utviklinga av den overordna behandlingsstudien, seier nasjonal prosjektleiar Else-Marie Løberg, professor og fag- og forskingssjef i Divisjon psykisk helsevern. Løberg understrekar at PEK har bidrege med rådgiving ved alle vegval og vore tydelege på kor viktig traumebehandling er ved psykose.
– Men særleg unikt er det at vi har fått ei ny prosjekttildeling for å sjå på problemstillingar som alle er valde av brukarane sjølve, held Løberg fram.
Problemstillingar valde av menneske med levd erfaring frå psykose
Anne Blindheim, forskingsrådgivar med erfaringskompetanse og leiar av PEK, stadfestar at problemstillingane er valde ut frå kva som har størst betydning for menneske med psykose.
Blindheim peikar på at eit fokus på dei bakanforliggande årsakene til psykose har vore etterlengta: – «Kvifor har de ikkje gjort dette før?!» var tilbakemeldinga frå PEK då prosjektet starta.
Nyleg deltok Blindheim og Løberg på eit europeisk ekspertnettverk for forsking på traumer og psykose i England. Blindheim presenterte modellen for brukarmedverknad i psykoseforsking gjennom PEK, og interessa for denne måten å integrere forsking og brukarsperspektiv på var stor.
KIT er òg støtta av Erfaringspanelet for psykisk helse og rus. – Erfaringspanelet føreslo å ta med støtte frå pårørande som ein av faktorane som kan påverke om behandlinga verkar, fortel Stine Hope Spjeld, leiar av panelet. – Dette er eit godt døme på kor viktig det er at problemstillingane i prosjektet er valde av brukarane sjølve, held ho fram.
Dagens Medisin har nyleg publisert ein kronikk på vegne av referansegruppa for KIT, som viser korleis nasjonale kompetansesenter, pårørande- og brukarorganisasjonar samt sentrale forskarar og klinikarar støttar opp under viktigheita av traumebehandling ved psykose.