Haukeland universitetssjukehus samarbeider med SPARK NS om ein ny behandlingsstrategi for Parkinsons sjukdom

Haukeland universitetssjukehus kunngjorde i dag oppstarten av ein ny sjukdomsmodifiserande klinisk studie for Parkinsons sjukdom. D‑SPARK-studien blir gjennomført i tett samarbeid med SPARK NS, ein uavhengig, ideell translasjonsforskningsorganisasjon med base i California, USA. SPARK NS støttar studien både økonomisk og med vitskapleg ekspertise. Gjennom dette samarbeidet skal D‑SPARK undersøkje ei ny terapeutisk tilnærming til Parkinsons sjukdom basert på det naturleg førekommande stoffet D‑serin.

Ei ny tilnærming med fokus på hjernekoplingar og plastisitet

Parkinsons sjukdom er ei progressiv nevrodegenerativ liding som råkar minst 12 millionar menneske globalt. Nyare studiar antydar at sjukdomen er den raskast veksande årsaka til nevrologisk funksjonsnedsetjing på verdsbasis. Dagens behandlingar kan lindre symptom, men påverkar ikkje dei underliggjande sjukdomsprosessane eller sjukdomsprogresjonen.
Inspirert av preklinisk forsking utført av professor David Sulzer ved Columbia University i New York, USA, vil D‑SPARK undersøkje om peroralt inntak av D‑serin kan bremse nevrodegenerasjonen og betre både motoriske og ikkje-motoriske symptom ved å styrkje koplingane mellom nerveceller i hjernen.
Forsking tyder på at D‑serin generelt er trygt og godt tolerert. Prekliniske studiar og tidlege kliniske undersøkingar indikerer mogleg effekt på både motoriske og ikkje-motoriske symptom, noko som gir eit godt vitskapleg grunnlag for vidare klinisk utprøving.

D‑SPARK-studien

D‑SPARK er ein klinisk fase II-studie som tek sikte på å inkludere 100 personar med Parkinsons sjukdom, rekruttert frå sjukehus over heile Noreg. Studien vil sjå på effekten av D‑serin på kliniske utfall, inkludert motoriske og ikkje-motoriske symptom, samt biomarkørar knytt til sjukdomsprogresjon.
Studien blir leia av professor Charalampos Tzoulis, med Dr. Haakon Berven som koordinerande utprøvar. Professor Tzoulis er leiar for Neuro‑SysMed Senter for klinisk behandling av og forsking på nevrologiske sjukdomar, K.G. Jebsen-senteret for Parkinsons sjukdom og Mohn-senteret for nevroproteksjon ved Haukeland universitetssjukehus og Universitetet i Bergen. Han har lang erfaring med design og leiing av kliniske studiar innan Parkinsons sjukdom. Dr. Berven er lege i spesialisering i nevrologi og har betydeleg erfaring frå kliniske Parkinson-studiar, mellom anna som koordinerande utprøvar i dei nyleg fullførte NR‑SAFE‑ og N‑DOSE-studiane.

“Vi har eit akutt behov for behandlingar som kan forseinke eller stanse utviklinga av Parkinsons sjukdom”, seier professor Tzoulis. “D‑SPARK-studien vil undersøkje det terapeutiske potensialet til D‑serin, eit lovande stoff med oppmuntrande resultat frå både preklinisk forsking og tidlege kliniske studiar. Vi er svært glade for samarbeidet med SPARK NS og takksame for deira vitskaplege og økonomiske støtte, som gjer denne studien mogleg.”

“SPARK NS og Haukeland universitetssjukehus deler eit sterkt engasjement for å fremje Parkinson-forsking som kan gi håp til pasientar med eit presserande behov”, seier Daria Mochly‑Rosen, PhD, Chief Science and Education Advisor i SPARK NS. “Vi er særleg beæra over å samarbeide med Haukeland universitetssjukehus og Charalampos Tzoulis, som er internasjonalt anerkjende leiarar innan Parkinson-forsking og kliniske studiar.”

For meir informasjon om studien, sjå ClinicalTrials.gov: D‑SPARK: A Clinical Trial of D‑Serine for Modifying Parkinson’s Disease Progression

Om SPARK NS

SPARK NS er ein uavhengig, ideell translasjonsforskningsorganisasjon etablert i 2023 for å fremje lovande akademiske funn innan nevrovitskap frå laboratoriet til klinikken. SPARK NS har særleg fokus på Parkinsons sjukdom og autisme. Gjennom sitt translasjonsprogram tilbyr SPARK NS forskarar finansiering, omfattande opplæring i legemiddelutvikling, praktisk rettleiing frå industrileiande ekspertar og deltaking i eit fagleg fellesskap som bidreg til å tette kunnskapshol og fjerne barrierar som kan hindre at lovande forskingsfunn kjem pasientar til gode. Programmet tilbyr òg vidare støtte til utvalde prosjekt etter endt programperiode.
For meir informasjon, besøk www.sparkns.org, følg oss på LinkedIn eller meld deg på for oppdateringar.