Ny 3D-modell for eggstokkreft publisert i eBioMedicine
Ei forskingsgruppe ved Haukeland universitetssjukehus og Universitetet i Bergen har fått publisert ein studie i det anerkjende tidsskriftet eBioMedicine. Artikkelen presenterer ein ny tredimensjonal modell for å studere spreiing av høggradig serøs eggstokkreft (HGSOC), ein kreftform som ofte blir oppdaga seint og er knytt til peritoneal karsinomatose, altså spreiing av kreftceller til bukhinna.
Artikkelen er tilgjengeleg her: A 3D ovarian cancer metastasis model using a decellularised peritoneal matrix to study therapy response - ScienceDirect
Prosjektet blir leia av seksjonsoverlege og professor Line Bjørge og professor Emmet McCormack. Christiane Helgestad Gjerde er førsteforfattar, med Katrin Kleinmanns som andreforfattar. Studien inkluderer bidrag frå Haukeland universitetssjukehus og CCBIO, Universitetet i Bergen, samt nasjonale og internasjonale samarbeidspartnarar.
Utvikla ei meir realistisk modell av sjukdomen
HGSOC‑metastasar i bukhinna skil seg tydeleg frå primærtumoren og andre metastatiske område, mellom anna når det gjeld tumor-mikromiljø og samansetjing av ekstracellulær matriks (ECM), altså støttevevet som ligg mellom cellene i kroppen. Å forstå korleis ECM påverkar tumorutvikling er viktig for å utvikle nye og meir målretta behandlingar.Forskarane har utvikla ein 3D-modell basert på ein avcellularisert peritoneal matriks frå gris, kalla PerMa. Dette er bukhinnevev der alle celler er fjerna, men strukturen og støttevevet (ECM) er bevart. Dette gir ein naturtru 3D-modell som eignar seg godt til forsking på kreft og behandling.
Gir nye moglegheiter for å teste behandling
Analysane viser at bukhinnevev frå gris har klare strukturelle og mekaniske likskapar med human bukhinne. PerMa-plattforma støttar tredimensjonal vekst av HGSOC‑cellelinjer og gjer det mogleg å undersøke respons på:
- tradisjonell cellegift
- nye cellebaserte immunterapiar
Med hjelp av avansert mikroskopi kan forskarane måle volumendringar i tumorcellene og dermed evaluere behandlingseffekt meir presist enn med tradisjonelle laboratoriemodellar.
Potensial for betre og meir målretta behandling
Modellen er eit viktig verktøy for å studere peritoneal karsinomatose ved HGSOC. Ho gir eit meir naturtru grunnlag for å teste behandling og kan bidra til utviklinga av nye terapiar med betre treffsikkerheit.
Studien viser òg potensial for bruk av modellen i forsking på andre kreftformer som spreier seg til bukhinna.