Årsraspporten for 2025

Årsrapporten for 2025 er publisert

Den nasjonale årsrapporten frå MS-registeret for 2025 er no tilgjengeleg. Rapporten samanfattar status for behandling, oppfølging og resultat for personar med multippel sklerose (MS) i Noreg, og er eit sentralt verktøy i arbeidet med kvalitetsforbetring i helsetenesta.

I år inneheld rapporten òg resultat for fem nye kvalitetsindikatorar. To av desse gjeld sjukdomsaktivitet i form av MS-attakkar og funksjonspåverknad. Datagrunnlaget har tidlegare vore for svakt til å gi pålitelege resultat, men er no tilstrekkeleg til å kunne rapportere på ein trygg måte.

Bruken av registerdata held seg stabilt høg, både i forsking, kvalitetsforbetringsprosjekt og ved utvikling av nasjonale kvalitetsindikatorar. Samstundes er det positivt at stadig fleire søkjarar kjem frå miljø utanfor det etablerte MS-forskingsmiljøet ved Haukeland universitetssjukehus.

Behov for betre innrapportering

Trass i mykje godt arbeid er det framleis utfordringar. Fleire helseføretak har låg måloppnåing når det gjeld oppdatert grunnoppfølging av pasientar. For nokre føretak har dette vore ei vedvarande utfordring over fleire år, sjølv med målretta tiltak og støtte. Mangelfull rapportering aukar risikoen for ulik kvalitet i behandlingstilbodet og svekkjer grunnlaget for styring og forbetring.

Registeret vil halde fram samarbeidet med avdelingsleiarar for å styrkje innrapporteringsrutinane og sikre betre datakvalitet nasjonalt.

Viktige resultat frå 2025

• Dekningsgraden i registeret er framleis høg: 82 % for nydiagnostiserte og 87 % totalt.
• Talet på registrerte personar med MS har auka til 15 577, der 13 760 er i live.
• Tida frå diagnose til behandlingsstart er ytterlegare redusert – 70 % startar behandling innan 21 dagar.
• Nesten alle nydiagnostiserte med attakkpreget MS startar no med høgeffektive legemiddel.
• 80 % av pasientar med attakkpreget MS (RRMS/RIS) får sjukdomsmodulerande behandling, medan 27 % av pasientar med primær progressiv MS (PPMS) får behandling.
• Om lag 20 % står utan behandling, med stor variasjon mellom helseføretaka.
• Sjukdomsaktiviteten er gjennomgåande låg: 98,5 % hadde ingen attakk siste år.
• Pasientrapporterte data viser at personar med MS opplever lågare fysisk og psykisk helse enn befolkninga elles, men betre fysisk helse hos dei som får behandling.
• 61 % av pasientar tidleg i sjukdomsforløpet har fått MR-oppfølging, med betydeleg variasjon mellom føretaka.

Takk for samarbeidet

MS-registeret ønskjer å takke MS-forbundet for eit langvarig og tett samarbeid, og for deira viktige bidrag til deltaking, formidling og oppfølging av resultata. Samstundes blir innsatsen frå tilsette ved nevrologiske avdelingar over heile landet framheva som avgjerande for datagrunnlaget i registeret.