Helse Bergen innfører mobil røntgenteneste til sjukeheimar
Frå no av kan sjukeheimspasientar få røntgenundersøking utan å forlate rommet sitt.
Denne veka starta Helse Bergen opp med mobil røntgenteneste. Det betyr at pasientar på sjukeheim som treng røntgen, ikkje lenger treng å reise til sjukehus. I staden kjem radiografen til dei, og bileta blir sende digitalt til røntgenlege for vurdering.
– Dette handlar om å gi god helsehjelp på ein måte som er trygg for pasienten og effektiv for tenesta. Mange sjukeheimsbebuarar er for svake til å bli transporterte, og for dei betyr dette ei forbetring, seier Ingfrid Helene Salvesen Haldorsen, direktør for Radiologisk avdeling ved Helse Bergen.
Nær pasienten – heile vegen
Den mobile tenesta gjer det mogleg å stille diagnose raskare og reduserer behovet for innlegging. Røntgenundersøkinga blir gjennomført på pasienten sitt rom, og bileta blir overførte direkte frå apparatet til spesialist på Haukeland.
I første omgang gjeld tilbodet sjukeheimar med kort køyreavstand, før det gradvis blir utvida til å gjelde innan ein times radius. Tenesta er heildigital, og radiografane kan arbeide effektivt på fleire stadar same dag.
Eit betre tilbod – for dei som treng det mest
Målgruppa er pasientar som er for skrøpelege til å reise, og der det hastar med diagnostikk. Mobil røntgen bidreg til meir treffsikker behandling, auka tryggleik og betre bruk av ressursane i helsevesenet.
Ein fornøgd sjukeheimslege
Nokre sjukeheimar har hatt eit liknande tilbod tidlegare, men etter å ha vore nedlagt
i nokre år er tilbodet no revidert og digitalisert og vil gjelde fleire sjukeheim og pasientar.
– Mobil røntgen er eit etterlengta og utelukkande positivt tilbod i sjukeheim. Sjølv om institusjonen vår har kort reiseveg til radiologisk avdeling er det ofte stor belastning for mange av våre skrøpelege bebuarar. Ventetid må reknast med, både til transport og til sjølve undersøkinga, seier Dagrun Gunnarson , sjukeheimslege ved Ladegården sjukeheim.
– Enkelte takkar nei til røntgen av den grunn. Dei fleste av våre bebuarar treng følge til undersøkinga. Dersom pårøyrande ikkje har høve til å følga må ein av dei tilsette følga. Denne organsieringa krev mykje logstikk og stel både tid og ressursar, seier Gunnarson.
Kort oppsummert:
Oppstart: 5. mai 2025
Røntgenundersøking på pasienten sitt rom
Bileta blir sende digitalt til røntgenlege
Mindre transport – raskare avklaring
Forventa færre innleggingar og mindre behov for pasienttransport
Les meir: Mobil røntgenteneste frå Helse Bergen - Helse Bergen HF