Hurtigtesting fører til raskare og meir målretta behandling av lungebetennelse
Ny forsking frå Helse Bergen og Universitetet i Bergen viser at hurtigtesting av pasientar i akuttmottaket kan gi betre og meir målretta behandling av samfunnserven lungebetennelse. På verdsbasis er dette ein av dei vanlegaste årsakene til sjukehusinnleggingar og dødsfall.
Foto: Sonja Ljostveit
Lungebetennelse er ein infeksjon i lungene, vanlegvis forårsaka av virus eller bakteriar. Samfunnserven lungebetennelse er lungebetennelse som oppstår utanfor helseinstitusjonar og er ein av dei vanlegaste smittsame sjukdommane, og ein viktig årsak til dødelegheit og sjukdom globalt. Ei studie publisert i JAMA Network viser at rask molekylær testing for pasientar innlagde med mistenkt samfunnserven lungebetennelse forkortar svartida og forbetra behandlinga.
Studien, med tittelen "Diagnostic Stewardship in Community-Acquired Pneumonia with syndromic molecular testing: A Randomized Clinical Trial" markerer eit viktig framsteg i handteringa av ein av dei vanlegaste årsakene til sjukehusinnleggingar og dødsfall over heile verda.
Den randomiserte studien, gjennomført ved akuttmottaket på Haukeland universitetssjukehus (HUS), samanlikna effekten av å bruka eit syndromisk PCR-basert panel for rask testing mot standard behandlingsprosedyrar. Studien viste at pasientane som blei randomisert til hurtig molekylær testing, hadde tre gonger større sjanse for å få målretta behandling. Det var også ein betydeleg reduksjon i tida til målretta behandling.
Studien er eit resultat av samarbeid mellom CAPNOR (Community-Acquired Pneumonia Norway), ein tverrfagleg forskingsgruppe som forener ekspertar frå norske institusjonar som Haukeland universitetssjukehus (HUS), Universitetet i Bergen (UiB), Drammen sjukehus, Universitetet i Oslo, og internasjonale partnarar frå Danmark, Nederland og Storbritannia. Studien blei koordinert av professor Harleen Grewal (Klinisk institutt 2, UiB) i samarbeid med professor Elling Ulvestad (Mikrobiologisk avdeling, HUS) og professor Rune Bjørneklett (Klinisk institutt 1, UiB).
– Denne studien viser at rask molekylær testing kan hjelpa legar med å ta hurtigare behandlingsbeslutningar, noko som potensielt kan forbetra utfalla for pasientar med samfunnserven lungebetennelse, seier overlege og forskar Dagfinn Markussen (Mottaksklinikken, HUS og Klinisk institutt 2, UiB).
– Sjølv om denne tilnærminga er lovande, er ho berre ein del av løysinga for effektiv handtering av luftvegsinfeksjonar og fornuftig bruk av antibiotika, legg han til.
Studien bidreg til ein betre forståing av korleis hurtig diagnostikk kan forbetra handteringa av infeksjonar som lungebetennelse, potensielt føra til meir effektiv bruk av antibiotika og betre pasientutfall. Resultata tyder på at rask molekylær testing, saman med kliniske beslutningsstøtteverktøy og antibiotikastyringsprogram, kan redusera unødvendig antibiotikabruk og forbetra pasientutfall.
Funnene viser kor viktig det er å inkludera avanserte diagnostiske verktøy i klinisk praksis. Slike verktøy gjer det mogleg å stilla ein meir nøyaktig diagnose og er dermed nøkkelen til meir riktig bruk av antibiotika, noko som er heilt nødvendig i ei tid med aukande antibiotikaresistens. Klikk på lenken for å lese artikkelen.