No kan kreftpasientar ved Haukeland få tilbod om presisjonsdiagnostikk
Tidlegare har denne diagnostiseringa kun vore tilgjengeleg innanfor forskingslaboratorium og i enkelte kliniske studiar, men no blir dette tilgjengeleg for fleire pasientar i Helse Bergen.
Publisert 13.02.2023
Viseadministrerande direktør Clara Gjesdal, direktør ved Kreftavdelinga Hans Petter Eikesdal, administrerande direktør Eivind Hansen og assisterande klinikkleiar ved Laboratorieklinikken Linda Sleire.
- Dette er ei viktig satsing for Laboratorieklinikken, og eit resultat av godt samarbeid mellom dyktige fagpersonar internt hos oss og i sjukehuset, seier Linda Sleire, assisterande klinikkleiar ved Laboratorieklinikken.
InPreD er ein nasjonal infrastruktur i helsetenesta som sørger for at kreftpasientar med avansert sjukdom over heile landet no kan få tilgang til avansert molekylær kreftdiagnostikk, i form av at svulsten blir detaljert undersøkt for forandringar i meir enn 500 gen (eit stort genpanel).
Innføring av InPreD i Helse Bergen gjer at ein no kan utføre avanserte genanalysar med påfølgande ekspertevaluering ved Haukeland universitetssjukehus. Dette betyr at pasientar som treng meir omfattande genanalysar, får tilbod om dette for å kunne bli inkludert i kliniske studiar eller for å finne sjeldne genfeil som styrer effekten av kreftbehandlinga.
Det gjør det mogleg med målretta behandling av ulike kreftformer, og denne milepælen blei markert i atriet i Laboratoriebygget sist veke, med kake og talar.
Administrerande direktør Eivind Hansen understreka behovet for presis diagnostisering for å unngå overbehandling, noko direktør ved Kreftavdelingen, Hans Petter Eikesdal, også poengterte.
- Den tydinga lab-analysane får for våre pasientar, auker for kvar dag som går. Vi skal prøve å gi den rette behandlinga til kvar enkelt pasient. Etableringa av dei genanalysane som blir gjort her, saman med den kliniske rådgivinga som kreftlegane skal gjere, blir viktig framover, sa Eikesdal.