Ventetida nærmar seg same nivå som i 2019

Helse Bergen har sett i verk fleire tiltak for å redusere ventetida:

• Auka bruk av digitale verktøy

• Betre informasjon til pasientane

• Rydding i ventelister og betre oversikt over ventande

• Frivillig ekstra arbeidsinnsats med kveldspoliklinikkar og helgepoliklinikkar

• I nokre tilfelle brukarstyrt poliklinikk, der pasienten i større grad sender informasjon til sjukehuset i forkant av timen

• Betre oppgåvedeling mellom legar, sjukepleiarar og helsefagarbeidarar

• Auka samarbeid med private aktørar

Administrerande direktør i Helse Bergen, Eivind Hansen, seier det er gledeleg å sjå at tiltaka har gitt resultat.

– I Helse Bergen er talet på ventande pasientar redusert frå 18 000 i april i fjor til under 13 000 i april i år. Dette er færre ventande enn før pandemien. Vi har hatt stor merksemd på dei som har venta lenge, over 90 dagar. Samstundes har sjukehuset teke imot dei som treng hjelp med ein gong, og dei pasientgruppene det hastar å behandle, og som skal ha kort ventetid. Det er lagt ned ein stor innsats for å få ned det totale talet på ventande, seier Hansen.

Gjennomsnittleg ventetid for dei som ventar i Helse Bergen er ved utgangen av april på 54 dagar, mot 66 dagar i april i fjor.

Hansen fortel at sjukehuset jobbar med varige tiltak slik at ventetida ikkje aukar igjen.

– Som sjukehus må vi jobbe målretta med god organisering av pasientforløp og kapasitetsutnytting. Vi må halde fram med systematisk forbetringsarbeid med tilvisingar og rettigheitsvurdering, og ha rutinar for opplæring av medarbeidarar. Pasientforløp kan forbetrast med digitale verktøy og god oppgåvedeling. Dette arbeidet gjer vi i samarbeid med tillitsvalde og verneombud, seier Hansen.