Spennande nytt naboskap

På "Mohn Synergy Symposium" førre veke fekk dei sjansen til å bli betre kjende og diskutere framtidige samarbeidsmoglegheiter.

Denne hausten vil forskarar frå Mohn forskingssenter for regenerativ medisin (MRCRM), Mohn forskingssenter for psykoselidingar (MRCP), og Mohn forskingssenter for hjernen (MRCB) ved Universitetet i Bergen og Helse Bergen kome tettare på kvarandre.

Dette skjer i samband med opprettinga av Bergen Center for Medical Stem Cell Research i 7. etasje på BB-bygget. Synergisymposiet er det første i sitt slag og markerte starten på det som kan bli tettare samarbeid mellom forskarane som alle har fått støtte frå Trond Mohn forskingsstifting, ei stifting som har vore viktig for å støtte forskinga i regionen.

Håp om magi

Foto: Paul André Sommerfeldt/UIB

Vibeke Vold, avdelingssjef ved Forsking- og utviklingsavdelinga ved Haukeland universitetssjukehus (HUS), uttrykte takksemd for stiftinga si støtte.

– Stiftinga sitt bidrag gjer det mogleg for oss å prøve ut nye metodar og forbetre forskinga vår. Vi er glade for å kunne fortsette dette arbeidet saman.

– Som den kjende forfattaren Roald Dahl ein gong sa: "Og framfor alt, sjå med glitrande auge på heile verda rundt deg, for dei største løyndommane er alltid gøymde på dei mest usannsynlege stadane. Dei som ikkje trur på magi, vil aldri finne den." Dette fangar perfekt ånda av det vi er vitne til her i dag. Når dyktige forskarar frå ulike felt samarbeider, kan dei avdekke løynd magi og skape noko verkeleg ekstraordinært, sa Vibeke Vold i si helsing.

Oddveig Åsheim, som er seniorrådgivar ved Trond Mohn forskingsstifting, kom òg med ei helsing etterfølgt av presentasjonar frå kvar av dei tre Mohn-sentra sine leiarar. Den opne delen av Synergisymposiet blei avslutta med innlegg frå toppforskarar frå kvart av sentra.

Gode moglegheiter for å styrke forskinga og utvikle nye behandlingsmetodar

Etter den opne delen av arrangementet på Armauer Hansens Hus var det eit lukka møte med kjernepersonalet frå kvart Mohn-senter. Over god mat og kaffi blei moglegheitene for samarbeid, overlappande interessefelt og eventuelle synergiar mellom dei tre sentra diskuterte.

– Som Oddveig Åsheim frå TMF la vekt på i si helsing, er eit av hovudkriteria for tildeling frå TMF evna til samarbeid. Vi er svært glade for at det lukka møtet bar preg av dette. Nye samarbeid og prosjekt spinn lettare vidare når ein kjenner kvarandre litt, seier Elise Aasebø, som saman med professor Erik Johnsen og seniorforskar Gyrid Nygård var initiativtakar til synergisymposiet. Møteleiar under den lukka delen var Gyrid Nygård.

– Det var eit veldig hyggeleg møte. Det var gode innspel frå dei ulike sentra, og vi har no lagt eit godt grunnlag for vidare diskusjonar. Forhåpentlegvis kan dette synergisymposiet munne ut i spennande felles forsking mellom dei tre Mohn-sentra. Vi gler oss til fortsetjinga, seier ho.

Foto: Paul André Sommerfeldt/UIB

Leiar for MRCRM og medarrangør av symposiet, Einar K. Kristoffersen, er svært positiv: – Ved å samle forskarar frå ulike fagfelt håper vi å finne nye løysingar som kan kome mange ulike pasientgrupper til gode. Fleire av forskarane som er involverte, er alt i ferd med å utvikle lovande cellebaserte terapiar. Samarbeidet mellom dei tre Mohn-sentra og opprettinga av "Bergen Center for Medical Stem Cell Research" gir gode moglegheiter for å styrke forskinga og utvikle nye behandlingsmetodar.

Erik Johnsen er leiar for MRCP og forsker på psykoselidingar. Dei tilgjengelege medisinane i dag behandlar primært symptoma ved desse lidingane, ikkje dei underliggjande årsakene.

– I tett dialog med brukarane, og ved å kombinere vårt pasientnære fokus med siste framsteg innan avansert stamcelleforsking, trur eg behandlinga av alvorlege psykiske lidingar kan endre seg markant til det betre i åra som kjem, seier han.