Adaptiv protonterapi ved øre-nese-halskreft
Prosjektet utviklar og prøver ut nye, dynamiske metodar for persontilpassa strålebehandling. Målet er å redusere vanlege seinskadar hos pasientar med kreft i hovud og hals.
Om prosjektet
Kreft i øre, nese og hals rammar over 800 personar kvart år i Noreg. Dei fleste får strålebehandling som ein del av behandlinga, og det blir viktigare å minske biverknader som kan oppstå etter stråling. Slike biverknader kan påverke livskvaliteten i lang tid. Protonterapi er ei ny form for strålebehandling som gjev meir presis behandling og skadar mindre friskt vev. Når dette blir kombinert med behandling som tilpassar seg endringar i kroppen undervegs, såkalla adaptiv protonterapi, kan ein redusere risikoen for biverknader ytterlegare.
Under behandlinga vil vi bruke fleire ulike typar avanserte bilete for å følgje med på endringar i kroppen. Dersom kroppen endrar seg, til dømes at svulsten blir mindre, kan vi justere behandlingsplanen undervegs. Vi vil prøve ulike måtar å gjere dette på og dei nye metodane skal til slutt prøvast ut i ein pilotstudie for å sjå om dei fungerer i praksis og om dei gjev betre resultat for pasientane.
Prosjektleiar: Grete May Engeseth, gmen@ihelse.net