BEaBiRD - Bergen group of Epidemiology and Biomarkers in Rheumatic Disease

BEaBiRD - Bergen group of Epidemiology and Biomarkers in Rheumatic Disease er ei forskingsgruppe lokalisert på Revmatologisk avdeling, Haukeland universitetssjukehus. Gruppa er nært knytta opp mot Klinisk institutt ved Universitetet i Bergen.

​​​​Store endringar i behandlinga av revmatiske sjukdommar dei siste 20 åra har ført til redusert sjukelegheit og betre prognose for pasientar med sjukdommar som leddgikt og osteoporose. I tillegg har betre bildediagnostiske metodar endra diagnostikken vesentleg og mellom anna gjort det mogeleg å identifisere nye undergrupper av sjukdom (for eksempel large vessel vasculitis ved kjempecellearteritt) og til og med heilt nye tilstandar.

Forskingsfelt

Forskingsgruppa arbeider med klinisk forsking og epidemiologiske studiar.

Vi undersøker epidemiologi og langtidseffektar ved revmatisk sjukdom, mellom anna fertilitet, hjarte-karsjukdom, kreft og død. Fleire ulike sjukdomar er under lupa, både vanlege tilstander som revmatoid artritt og beinskjørheit, og sjeldnare sjukdomar som Sjögrens syndrom, kjempecellearteritt og IgG4-relatert sjukdom. Prosjekt som omhandlar livskvalitet i ulike pasientgrupper og betydninga av kosthald går også føre seg på avdelinga.

Vi leiar også eit prosjekt på Zanzibar, Tanzania, der ein lokal lege og forskar arbeidar med å kartlegge og forbetre handteringa av pasientar med kronisk inflammatorisk leddsjukdom blant dei 1,8 millionar innbyggjarane der.

Datamateriale

Store datakjelder som Norsk kvalitetsregister for artrittsykdommer (NorArtritt) og Bergen Sjögren kohort er grunnlag for fleire av prosjekta. I seinare år har vi også etablert lokale- og nasjonale kohortar for utvalde systemiske revmatiske sjukdommar mellom anna storkarsvaskulitt og IgG4-relatert sjukdom. Forskinga er basert på kunnskapen representert ved vårt team av erfarne og unge forskarar. Vidare drar vi nytte av eit mangeårig samarbeid med Broegelmann forskingslaboratorium ved Universitetet i Bergen.

Vårt endelege mål er å betre handtering og utfall av kronisk inflammatorisk leddsjukdom, kjempecellearteritt, beinskjørheit, IgG4-relatert sjukdom og Sjögren's syndrom.

Vi er takknemlege for støtta vi har mottatt frå Riebers allmennyttige fond ved Johanne Marie Martens Rieber.​

Revmatologisk avdeling
Haukeland universitetssjukehus
5021 Bergen

Bjørg-Tilde Fevang
+47 55 97 54 23

Bergen group og Epidemiology and Biomarkers in Rheumatic Disease.