Mellom nakkevirvlane er det støytputer (mellomvirvelskiver). Skivene har ein blaut kjerne og ein kapsel. Med alderen blir skiva endra, og den ytre kapselen kan sprekke heilt eller delvis og gi prolaps (skiveutgliding).
Nakkeprolaps og forkalkingar kan gi ei smerte i nakken som stråler ut i éin eller begge armane. Smerteintensiteten kan variere alt etter kva stilling du held hovudet i. Nokon vil også merke nedsett hudkjensle og redusert kraft i armen, såkalla nevrologiske utfall.
Kva rørsler som blir svekte, og kva område av armen som får nedsett kjensle, avheng av kva nerverot som blir påverka. Av og til kan det vere trykk mot sjølve ryggmergen, noko som kan gi gangvanskar, blæreproblem, nomenheit og prikkingar i armar og bein.
Dei fleste prolapsane vil bli mindre dei første vekene, slik at symptoma gradvis forsvinn. Rundt 2 av 10 pasientar med nakkeprolaps vil ha behov for vurdering for kirurgi.
Dei fleste operasjonane blir gjennomførte 3–6 månader etter at prolapset oppstod. Operasjon er aktuelt dersom du har vedvarande utstrålande smerter eller funksjonsnedsetjing i den eine eller begge armane trass i optimalisert behandling med medisinar og fysioterapi/tilpassa trening.
Formålet med operasjonen er å avlaste trykket på nervane for å gi smertelindring i armen, og auke sjansen for å vinne tilbake muskelkraft og hudkjensle. Dersom du har invalidierande smerter eller nedsett kraft i éin eller begge armane, skal du kontakte lege slik at ein får vurdert om du treng akutt operasjon.
Du må ha tilvising frå fastlege etter at du har teke MR av nakken som viser prolaps eller annan trongheit (stenoser) for nervane, som kan forklare plagene dine. Ventetid til poliklinisk vurderingstime vil vere avhengig av hastegrad vurdert etter informasjon i tilvisinga og funn på MR-undersøkinga.
Dersom MR-undersøkinga er teken ved eit anna sjukehus eller ved eit privat røntgeninstitutt, kan det ta noko tid for oss å få innhenta bileta.
Ved undersøkinga vil legen sjå på rørsler i nakken, teste krafta i armar og hender, teste hudkjensle og refleksar. I løpet av den polikliniske timen skal de komme fram til ein vidare behandlingsplan anten operasjon eller å halde fram med medisinsk eller fysikalsk behandling.
Du treng ikkje å førebu deg til undersøkinga.
Dersom du skal opererast, vil ventetida for operasjon først og fremst vurderast ut frå symptom og risiko for varig funksjonsnedsetjing.
Røyking og dagleg inntak av alkohol gir ein auka risiko for komplikasjonar etter operasjonen. Røyking forseinkar heilinga av operasjonssåra. Vi tilrår derfor at du held opp med å røykje og drikk minst mogleg alkohol i tida før operasjonen.
Du vil få nærare beskjed om kva for nokre av dei faste medisinane dine du skal ta på operasjonsdagen. Ved bruk av blodfortynnande medisinar (til dømes Marevan, Albyl-E, Plavix) må du avklare med kirurgen og/eller fastlegen din om og når du må slutte med desse før operasjonen.
Dei fleste pasientar blir lagde inn på sjukehuset same dag som operasjonen skal gjennomførast. Den generelle helsetilstanden din og avstand til sjukehuset er avgjerande for om du må leggjast inn dagen før operasjonen.
På innleggingsdagen blir du teken imot av sjukepleiar som gir deg informasjon og svarer på spørsmål. Deretter får du snakke med kirurgen, som regel den du var hos på poliklinikken. Kirurgen som skal operere deg vil også gi deg informasjon om inngrepet
Ta dei tablettane som du har avtalt med legen at du skal ta.
Den vanlegaste operasjonen for nakkeprolaps blir kalla fremre cervikal diskektomi med bur (fremre dekompresjon). Operasjonen blir gjord i full narkose og varer i 1–2 timar. Mesteparten av operasjonen blir gjord under mikroskop.
Det blir laga eit lite hudsnitt på halsen. Matrøyret og luftrøyret blir skove varsamt til sida slik at fremre del av nakkevirvlane blir avdekte. Mellomvirvelskiva (støytputa) blir fjerna saman med det som pressar på nervane eller ryggmergen. Skiva blir vanlegvis erstatta med eit implantat (propp) laga av titan.
Etter operasjonen vil du vere nokre timar på overvakingsavdelinga.
Nakken din er stabil etter operasjonen, men du skal unngå store rørsler i nakken, som å bøye hovudet kraftig bakover dei første 2 vekene etter operasjonen.
Seinare same dag eller dagen etter operasjonen reiser du heim.
Du kan dusje 2 dagar etter operasjonen. Bandasjen blir skifta etter dusjing. Dersom såret er sydd med vanlege sting i huda, blir desse fjerna hos fastlegen din 10-12 dagar etter operasjonen.
Vanlegvis får du sjukmelding for 4-6 veker. Denne tida blir tilpassa yrkt ditt.
For å unngå muskelspenningar kan du gjere øvingar fleire gonger dagleg den første tida etter operasjonen:
Vanlege plager og komplikasjonar
Det er vanleg at du har vondt i halsen nokre dagar etter operasjonen.
Blødingar kan førekomme dei første timane etter operasjonen. Ved bløding, kan det vere nødvendig med reoperasjon.
Du kan oppleve forbigåande problem med å svelge og noko endra styrke og tonebreidde på stemma. Det er sjeldan at dette blir varig plagar.
Meir sjeldne plager er skade på ryggmerg eller på nervane som går ut i armane.
Dersom du får infeksjon i såret, kan dette i dei fleste tilfelle behandlast med antibiotika
Ventetid: 8 - 24 uker
Kontakt Nevrokirurgisk avdeling
Haukelandsveien 22
5021 Bergen
Jonas Lies vei 71
5053 Bergen