Multippel sklerose (MS) – fysioterapi

For at fysioterapeuten skal få vurdert funksjonen og rørslekvaliteten din er det viktig at du har på deg klede som er lette å bevege seg i. Ta med gode sko, shorts og T-skjorte/singlet. Det kan vere behov for noko avkledning sånn at fysioterapeuten kan sjå korleis muskulaturen din fungerer. Ta med ortosar/skjener eller ganghjelpemiddel dersom du bruker dette.

Tenk gjennom forventningane dine til vurderinga til fysioterapeuten, og kva mål du har for tiltak og behandling.

Dersom det er behov for taxi til konsultasjonen, må du kontakte Fysioterapi-administrasjonen.

Det mest vanlege er at konsultasjonen varer opp mot 1 time.

Fysioterapeuten vil gjennom samtale kartlegge sjukehistorie, det aktuelle funksjonstapet og utfordringar i kvardagen eller i samband med trening og fysisk aktivitet. Deretter vil det gjennomførast ulike testar for rørsle, funksjon og aktivitet. Det kan vere aktuelt å nytte spesifikke testar og skjema for å kartlegge målbare funn frå undersøkinga. Det kan vere behov for samarbeid med andre faggrupper, for eksempel  ergoterapeut.

Funksjonsvurdering hos fysioterapeut

• Vurdering av grad av sjølvstende i flytting og gonge
• Kartlegging av rørsle: Kroppshaldning, kvalitet i rørsle og funksjon, funksjon i mage/rygg, balanse, stabilitet, aktive og passive leddutslag, muskelstyrke, muskelspenning, vevskvalitet, smerte, følesans, avspenningsevne, muskulær tøybarheit og andre aktuelle kroppsfunksjonar.
• Utprøving av aktuelle tiltak og behandlingsmetodar
• Vurdering av behov for ortopediske hjelpemiddel (for eksempel ankelskjener/-ortosar). Dersom hjelpemiddelet er til hjelp i funksjon eller aktivitet kan fysioterapeut organisere søknad om dette til NAV.

Mål

• Optimal evne til å fungere i miljøet ditt, for eksempel i jobb, rundt i heimen, i fritidsaktivitetar og i sosiale samanhengar
• Mest mogleg sjølvstende i funksjon, flytting og daglege aktivitetar
• Redusert fallrisiko
• Optimal kvalitet i rørsle og funksjon

Eventuelle tiltak

• Råd og rettleiing tilpassa din situasjon
• Instruksjon i individuelt tilpassa øvingar, tøyingar og avspenning
• Korrigering av kroppshaldning og rørslemønster
• Stimulere til betring av balanse og kontroll i mage/rygg
• Funksjonsretta trening basert på krav i kvardagen
• Oppfordringar for fysisk aktivitet og trening
• Råd om energiøkonomisering i aktivitet, sosiale arenaer og jobb
• Smertedempande tiltak og blautvevsbehandling

Ei tilvising til poliklinisk fysioterapi gir ei ramme for oppfølging frå éin til seks gonger, avhengig av behovet ditt. Dersom det på eit seinare tidspunkt oppstår funksjonstap eller ny problemstilling, kan du bli tilvist til ny poliklinisk vurdering.

Det kan vere aktuelt å tilvise deg til vidare oppfølging hos ekstern fysioterapeut. Dette kan vere fysioterapeut i kommunen, fysioterapeut med driftstilskot som først og fremst har nevrologisk kompetanse og/eller til gruppetrening for pasientar med MS.

Ved behov for rehabilitering kan fysioterapeut vere behjelpeleg med å formidle dette til ansvarleg lege slik at søknadsprosessen kan settast i gang. Ved behov for og ønske om utarbeiding av spesifikke og tilpassa øvingar kan fysioterapeuten gjere dette. Det kan vere øvingar for eigentrening i heimen eller råd og tips som kan takast med til ekstern fysioterapeut.

Fysioterapeuten skriv ein rapport som du kan få tilsendt med beskriving av funksjon og oppfordringar for vidare tiltak. Kopi av rapporten kan også sendast til fastlege eller ekstern fysioterapeut om ønskeleg.