Laboratorie- og radiologitilbodet gir rask og presis diagnostikk og kloke behandlingsval
Riktig bruk av laboratorie- og bildediagnostikk er heilt sentralt i pasientbehandlinga. Det bidrar til presis diagnostikk og rett behandling, til å gjere kloke behandlingsval og utvikle helsetenestene.

Laboratorie- og radiologitenestene understøttar samanhengande og føreseielege pasientforløp der korte transportvegar og god prøvelogistikk er viktige føresetnader for å sikre raske prøvesvar.
Laboratorie- og radiologitenester er òg viktige for beredskapshendingar, og vi må ha planar for å ha tilstrekkeleg kapasitet til å handtere behova i kriser og krig. Radiologiske undersøkingar og laboratorieanalysar står sentralt i vurderinga av kva pasientar som vil ha nytte av nye behandlingsmetodar. Dei legg òg til rette for presisjonsmedisin og persontilpassa behandling gjennom bruk av avansert diagnostikk, genetiske data og biomarkørar.
I organiseringa av laboratorietenestene, det bildediagnostiske tilbodet og bilderettleia behandling tar vi i bruk teknologiske moglegheiter for å betre kvaliteten og auke kapasiteten. Vi trur kunstig intelligens, automatisering og pasientnære løysingar vil bidra til dette. Vi vil òg dra nytte av kompetanse på tvers av einingar, lokalt og regionalt, og mellom private og offentlege tenesteleverandørar. Det er nødvendig å avklare spørsmål knytt til funksjonsdeling, desentralisering og sentralisering i regionen for å utvikle tilbodet med god bruk av ressursane og til det beste for
pasientane.
Korleis veit vi at vi er på rett veg?
- Gjennomsnittleg tid frå ønska time til godkjent svar for laboratorie- og radiologiundersøkingar går ned
- Del undersøkingar og beskrivingar ikkje utført i tråd med prioritert hastegrad, går ned
- Talet på laboratorieanalysar per 1 000 pasientar går ned
- Talet på radiologiske undersøkingar per 1 000 pasientar går ned